Pasientar med nyrekreft vil kome i kontakt med Kreftavdelinga når sjukdommen har spreidd seg eller svulsten i nyra ikkje kan bli operert bort.
I mange tilfelle blir slike forhold oppdaga ved urologisk seksjon der dei fleste pasientar med nyrekreft blir følgde opp.

Behandling
Kirurgi
Kreftavdelinga har eit tett samarbeid med urologisk seksjon (og andre kirurgiske avdelingar). I første omgang blir det gjennomført ein tverrfagleg diskusjon om mulegheita for å operere bort svulsten og/ eller spreiingssvulsten(ane).

Er dette ikkje muleg kan behandling med nyare kreftmedikament (såkalla "tyrosinkinasehemmarar") eller strålebehandling vere nyttig for pasienten. I så fall overtar vanlegvis Kreftavdelinga behandlingsansvaret.

Medikamentell behandling
Dei ovafor nemnde "tyrosinkinasehemmarar" er ei kreftbehandling i tablettform. Tablettane skal bli tatt meir eller mindre kontinuerleg. Med jamne mellomrom blir effekten undersøkt ved hjelp av røntgenundersøkingar.

Strålebehandling
Strålebehandlinga anten aleine eller i kombinasjon med operasjon, kjem ofte til å vere aktuelt ved spreiing til skjelettet, i sjeldne tilfelle også ved spreiing til andre organ. Behandlingsopplegga varierer sterkt og behandlingstida kan bli alt frå ein dag til fleire veker.

Vi er heile tida opptatt av å vurdere pasienten sin allmenntilstand og livssituasjon i tillegg til dei andre opplysningane om kreftsjukdommen. Fordi behandlinga kan gi plagsame biverknader, og ikkje alltid verkar, er det her særleg viktig at konsekvensane av behandlinga blir vurdert saman med pasienten før behandlingsopplegget blir bestemt.

Utprøvande behandling/ kliniske studium
Standard førsteval ved medikamentell behandling per i dag er eit medikament som heiter Sutent® (verkestoff: sunitinib). Medikamentet verkar betre enn den gamle standardbehandlinga, men likevel ikkje hos alle pasientar. Likevel får alle biverknader, samtidig som medikamentet er kostbart. Derfor har vi, i samarbeid med dr. Beisland ved urologisk seksjon, starta ein studie for å finne faktorar som kan føreseie, anten før behandlinga startar eller tidleg i løpet, kva for pasientar medikamentet verkar på.
Dersom ein vel å delta får ein same standardbehandling som dei som ikkje er med i studien, men det blir tatt ein del fleire prøver både før behandlingsstart og undervegs. Studien kjem ikkje til å ha nokon innverknad på behandlinga til pasientane som er med, men resultata kan vere nyttige for behandling av framtidige pasientar