Lymfekreft (Lymfom)

Behandlinga av lymfekreft blir tilpassa den enkelte og vurdert blant anna ut frå lymfekreft-type, kor langt sjukdommen har kome, og alder. Dei vanlegaste formene for behandling er cellegift, antistoff-behandling og strålebehandling.

Av Kreftavdelinga, Haukeland universitetssjukehus

Vi skil mellom "standard" behandling, som er den behandlinga som reknast som "nasjonal standard", og "utprøvande" behandling, som er forskingsprotokollar som tar sikte på å bidra til å utvikle behandlinga vidare. Nokon av pasientane vil få spørsmål om deltaking i ein forskingsprotokoll. Deltaking i ein slik forskingsprotokoll er likevel alltid frivillig.

Pasientar som får påvist lymfekreft vil få eigne informasjonssamtaler der ein blant anna gir informasjon om lymfekreft generelt, resultatet av utgreiinga, tilrådd behandling, forventa behandlingsrelaterte biverknader og behandlingsmålsetjing for den enkelte.