|
Telefon:
56 53 35 35
|
Adresse:
Barne- og ungdomspsykiatrisk poliklinikk Voss
Sjukehusvn. 16
5700 Voss |
Telefaks
56 53 35 50 |
Kart:
Sjukehusvegen 16 |
Voss gjev psykisk helsehjelp til born og unge i alderen 0-18 år og deira foreldre. Alle barn og unge får eit individuelt tilrettelagt tilbod, der barnet/ungdomen og foreldra si eiga vurdering vert tillagt stor vekt.
Behandlinga kan vera individualterapi til barnet/ungdomen, til dømes leiketerapi eller samtaleterapi, eller det kan vera foreldrerettleiing eller familieterapi.
Vidare kan me samarbeida med andre som har med barnet/ungdomen å gjera, vera med å hjelpa fram andre typar hjelp, slik som støttekontakt, spesialundervisning eller anna. Dette skjer alltid i eit ope samarbeid med foreldra og barnet/ungdomen sjølv.
Vi kan bidra med hjelp til barn og ungdom i vanskar
Utgangspunktet for kontakt med BUP er problem eller vanskar hjå eit barn eller ungdom, eller i familien. Døme på problem kan vera angst, uro, einsemd, skuleskulk, mistrivnad, spisevanskar, familiekonflikt, oppdragelsesvanskar osb. BUP har òg ansvar for utgreiing og behandling av alvorlege tilstandar som autisme, psykose og depresjon. Vidare skal me hjelpa born og unge som er utsett for mishandling, seksuelle overgrep eller som har tankar om sjølvmord. På poliklinikken arbeider det lege, psykolog, sosionom og pedagog. Alle som arbeider ved BUP har teieplikt.
Slik kjem du i kontakt med oss
Dei som kjem til oss har gjerne fyrst fått hjelp eller teke opp problemet på helsestasjonen, PPT, hjå lege eller annan instans. Kontakten med oss kjem i stand etter samtykke frå føresette, ev. ungdomen sjølv, og det vert sendt skriftleg tilvising. Når me får tilvisinga, vert saka teke imot og ein eller fleire fagpersonar får ansvaret for å fylgja saka. Ettersom kontakt med oss er frivillig og ynskt, inviterer me alltid pasient og/eller foreldre til ein drøftingssamtale for å avklara kva problemet er og kva ein ynskjer hjelp til. I nokre høve deltek tilvisar i denne samtalen. Barn over 16 år kan på eige initiativ ha kontakt med oss. Dersom barnet er over 16 år får det velja om foreldra skal vera med.
Korleis de vil oppleva utbytte av hjelpa, er svært avhengig av korleis samarbeidet mellom dykk og oss utviklar seg. Det er difor fint om de på førehand har tenkt igjennom kva hjelp de ynskjer av oss og korleis de ynskjer at samarbeidet skal vera. Hjelpa er gratis. Reiseutgifter/tap av arbeidsinntekt vert delvis dekka av trygdekontoret i heimkommunen.
Kor er me ?
BUP Voss held til på Voss sjukehus i 1. høgda i hovudbygget, med eigen inngang på austsida (mot Voss sjukeheim). Me har òg kontor i Kvam. Kor du skal møta står på innkallinga.
Velkomen til oss!
Beste helsing dei tilsette ved BUP Voss.
Publisert
24.05.2010 17:02 |
Endret
10.06.2010 16:39