Utanlandsbehandling 

Helse Vest RHF har ansvaret for at pasientar som høyrer heime i Rogaland, Hordaland og Sogn og Fjordane får behandling i utlandet når dei har krav på det. Ansvaret for å behandle slike søknadar har Helse Vest RHF lagt til Helse Bergen HF.

Eining for utanlandsbehandling behandlar og avgjer søknadar om utanlandsbehandling. Dei dekkjer også utgiftene til innvilga behandling, og til reise- og opphaldsutgifter. Norsk Pasientskadeerstatning gjeld også for pasientar som er behandla i utlandet etter denne ordninga.

Vilkår for rett til behandling i utlandet:

• Pasienten må ha rett til nødvendig helsehjelp i spesialisthelsetenesta. Dette er ei vurdering som blir gjort av spesialistar i spesialisthelsetenesta.

Det betyr at pasienten som hovudregel bør ha vore tilvist til eller behandla i spesialisthelsetenesta. For å ha rett til nødvendig helsehjelp (prioritert helsehjelp), blir det stilt krav til kor alvorleg sjukdommen er, forventa nytte av behandlinga og at kostnadane står i rimeleg forhold til behandlinga sin nytteeffekt.

• At det ikkje finnast eit adekvat medisinsk behandlingstilbod for pasienten sin tilstand i Noreg. Pasienten har ikkje rett til behandling i utlandet dersom det finnast eit anerkjent behandlingstilbod i Noreg, sjølv om det blir tilbydd behandling etter andre metodar i utlandet.

Manglande kapasitet og lang ventetid i spesialisthelsetenesta gir ikkje rett til behandling etter denne regelen. Det er berre når behandling ikkje kan utførast forsvarleg i Noreg etter akseptert metode at det ligg føre manglande kompetanse i Noreg. Det blir som hovudregel ikkje gitt dekning til såkalla eksperimentell eller utprøvande behandling.

Om saksbehandlinga

• Det må sendast skriftlig søknad om behandling i utlandet, fortrinnsvis på fastsett søknadsskjema. I søknaden må det bli lagt ved medisinske opplysningar som dokumenterer sjukdom/ behandlingsbehov.

• Fritt sjukehusval gjeld ikkje ved behandling i utlandet. Eining for utanlandsbehandling avgjer kvar pasienten skal få behandling, også om den utanlandske behandlingsstaden kan gi eit adekvat og forsvarleg behandlingstilbod som er tilstrekkeleg vitskapleg dokumentert (etablert behandling).

• Når søknaden er avgjort, sender Eining for utanlandsbehandling skriftleg svar på søknaden til pasient, og eventuelt den legen som har søkt på pasienten sine vegne. Avslag på søknad kan klagast til Klagenemnda for behandling i utlandet.

• Dersom pasienten meiner å ha rett til å få dekt behandling i utlandet på grunn av kompetansemangel i Noreg, blir det tilrådd å søkje om godkjenning før det blir tatt imot behandlingstilbod frå utlandet. I motsett fall risikerer pasienten å måtte dekke alle kostnadar til behandling, reise og opphald sjølv.

I samband med dette gjer vi særleg merksam på at heimtransport i slike tilfelle ikkje blir dekt av vanleg reiseforsikring, fordi sjukdommen var kjend på førehand og formålet med reisa var å få behandling. Eventuell sjuketransport med ambulansefly er svært kostbart og kan i verste fall koste millionbeløp.

OBS!
Når ein på eige initiativ kjøper seg behandling i utlandet, har ein heller ikkje krav på erstatning frå Norsk pasientskadeerstatning (NPE) ved feilbehandling.

Aktuelle skjema for behandling i utlandet:

• Søknadsskjema (Word) Rettleiing til søknadsskjemaet
  Opne skjemaet og fyll det ut elektronisk, så blir det lettare for oss å behandle søknaden din. Skriv ut ferdig utfylt skjema og send det til:
  Eining for utanlandsbehandling,
  Helse Bergen HF, 5021 Bergen.
• Reiserekningsskjema