Gutebarn mest utsett for brannskade 

Det viser ein fersk studie om brannskadar hos barn i Bergen gjennomført i 2007. Dei aller fleste brannskadar hos barn ­under 16 år skuldast kontakt- eller skåldings­skade.

– Og det viser seg at dei aller fleste uhell skjer mellom klokka 15 og 19 på kvar­dagar, fortel seksjonsoverlege Hallvard Vindenes ved Kirurgisk klinikk på Haukeland Universitetssjukehus. Han og Christina Brudvik ved Bergen legevakt har vore rettleiarar for medisinarstudentane Eli Leirdal Hoem og Brita Luggenes som nyleg har levert inn den ferske studien.

51 prosent av brannskadane  skuldast kontakt med varme overflater.     44 prosent av brannskadane skuldast skålding.     5 prosent av brannskadane skuldast blandt anna solforbrenning og elektriske skadar.

Skjer heime
Dei desidert hyppigaste årsakene til at barn brenn seg, er varm mat og drikke ­eller peis, vedomn og varmeomn. Komfyr er også ei hyppig årsak og over 90 prosent av alle skadane skjer innandørs.

– Vi ser at dei aller fleste ulykkene skjer heime eller på besøk hos familie og vener, opplyser Vindenes.
Han legg til at det er muleg å førebygge mange av desse skadane, og viser til ein studie i Harstad frå 1986 til 1999. Der ville ein finne ut om systematisk førebyggande tiltak verka. Sikring av komfyr, senking av temperaturen i varmtvannsberedar og ­informasjon til foreldre og føresette førte til ein stor nedgang i brannskadar blant barn under fem år. Gjennomsnittleg vart brannskadane reduserte med 51,5 prosent.

– I Bergen har ein ikkje gjennomført til­svarande systematisk arbeid for å føre­bygge brannskadar, seier Hallvard Vindenes.

Inga endring
Tilsvarande registrering av brannskadar blant barn i Bergen er gjort tidlegare – i 1989 og 1998. Den tredje studien viser at det ikkje er noko endring i kor mange barn som vert råka av brannskadar. Rundt tre av 1000 barn under 15 år får brannskadar som gjer at dei må oppsøkje legevakt ­eller sjukehus. I fjor var det 145 barn under 15 år som fekk behandling for brannskadar. Dei som oppsøkte fastlege for denne ­typen skadar, er ikkje med i studien.

Studien blei gjennomført ved Bergen ­Legevakt, vaktstasjonane i Fana, Åsane og Loddefjord og ved Brannskade­avsnittet ved Haukeland Universitetssjukehus.