Trygg overføring 

Sidan 2007 har Medisinsk avdeling på Haukeland universitetssjukehus hatt eit samarbeidsprosjekt med Bergen kommune og Høgskolen i Bergen om å kvalitetssikre overgangen for pasientar mellom ulike tenestenivå. Post 8, post 1 vest og post 1 nord er dei på Haukeland som er med i prosjektet, som skal halde på fram til 2011.

Fase 2
- Å seie at det er tryggare, betyr i denne samanhengen eit betre tverrfagleg samarbeid og større grad av standardisert kommunikasjon mellom tenesteytarane som har med pasienten å gjere - både før, under og etter ein innlegging på Haukeland, seier Bjørnethun.

Ho fortel at prosjektet starta med bakgrunn i rettleiingsmidlar for studentar, som sidan ble til utviklingsmidlar. I fase 1 av prosjektet ble journalgransking og intensive intervju gjennomført med sjukepleiarar.

- Resultatet avdekte ein rekkje flaskehalsar som var til hinder for samhandling mellom spesialist- og primærhelsetenesta. Det er dei vi tar tak i no når vi er gått inn i fase 2 av prosjektet, forklarar ho.

Konvolutt med sjekkpunkter
- Det banale, men også mest geniale er denne, seier sjukepleiaren og viser fram ein stor konvolutt.

Denne konvolutten skal følgje pasienten heile tida og er utarbeidd for å sikre at alt som skal ordnast i samband med utskriving til primærhelsetenesta, blir gjort systematisk. I tillegg til konvolutten er det også laga ei sjekkliste. Heimesjukepleia som er involvert i prosjektet, har tilsvarande konvolutt og sjekkliste som dei bruker når pasienten reiser frå dei til sjukehuset.

- Sjekklistene og konvolutten er utarbeidd med utgangspunkt i dei nye rutinane for samhandling mellom sjukehuset og kommunane. Vi tek dei i bruk allereie første dag etter innlegging slik at vi kartlegger og samarbeidar med primærhelsetenesta og sikrar at vi snakkar om det same samtidig, påpeiker Bjørnethun.

Tverrfagleg samarbeid
Eit anna tiltak som allereie er satt i gong, er auka samarbeid mellom sjukepleiarar, legar og ergoterapeutar på dei tre postane.

- Sjukepleiarane har rolla som koordinator og skal ha ein oversikt over oppgåvene til alle faggruppene som har med pasienten å gjere. Det fører ofte til at dei gjer litt av alt. Avdelinga opplever at fagkompetansen til ergoterapeutane har ført til ein kvalitetsforbetring knytt til kartlegging av pasientane sitt funksjonsnivå ved utreise, seier Bjørnethun.

Berre starten
- Tiltaka som er satt i gong no er berre nokre av fleire tiltak og er ein god start på det som skal fortsette å vere eit veldig nyttig samarbeid mellom ulike faggrupper, samt mellom stat og kommune, poengterer Bjørnethun.