Mohn åpna den overraskande gåva under arrangementet for utdeling av stipend frå Bergen Medisinske Forskningsstiftelse.
Etter at dei fire stipenda var utdelt, skulle Trond Mohn holde et innlegg med tittelen: Hvorfor medisinsk forskningsstiftelse?
- Eg svarar som den nordnorske jenta: Æ skjønne ikkje spørsmålsstillinga! Eg likar å gi, saman skal vi gjere kvarandre gode, vi skal ta ansvar – og vi skal ha mykje gøy framover! sa Trond Mohn.
Så proklamerte han at han ville vere julenisse, og kom med den overraskande nyheita om at han vil gi pengar til ei heilt ny 3-Tesla MR-maskin. Maskina har ein kostnad på om lag 15 til 20 millionar kroner, og Mohn gir gåva gjennom Bergen Medisinske Forskningsstiftelse.
Haukeland har ei slik maskin frå før, og den er viktig både i forsking og i arbeidet med å stille meir presise diagnosar på pasientane. No vil det bli endå større moglegheiter med ei ny maskin av same type.
- Dette er heilt fantastisk! sa administrerande direktør Stener Kvinnsland. Han var ein av dei få som visste om gåva på førehand, Trond Mohn har alltid ein diskusjon med Kvinnsland på førehand for å sikre at sjukehuset får den gåva sjukehuset treng.
- Gåvene frå Mohn er alltid uproblematiske i den forstand at det alltid er sjukehuset sine prioriteringar som styrer kva pengane skal gå til, sa Kvinnsland.
Trond Mohn brukte barneboka Regnbuefisken som bilete på kvifor han har gitt bidrag både til forskingsstiftinga og til sjukehuset. Med stor innleving fortalde han om Regnbuefisken som svømte rundt i havet og var så einsam. Det var først då han begynte å gi bort nokre av dei sølvskimrande skjella sine at han blei lykkeleg.
- Den boka kan eg anbefale både foreldre og besteforeldre, sa Mohn då han hadde delt ut årets julegåve på Haukeland.
Publisert
16.12.2011 16:05 |
Endret
19.12.2011 09:23