Fluge (t.v) & Mella. Foto: Tor Erik H. Mathiesen.
Per i dag er det inga etablert eller akseptert behandling med medisin ved ME (myalgisk encefalomyelitt/kronisk utmattelsessyndrom). Den positive responsen på den nye behandlinga kan og peika på ei årsak til sjukdommen, som i dag er ukjend. Forskingsresultata vart publisert i tidsskriftet
PLoS One (Public Library of Science) 19.10.2011.
Ulik varigheit på respons
Saman med avdelingsdirektør og professor Olav Mella ved Kreftavdelinga, leier overlege dr.med. Øystein Fluge forskingsgruppa som no har gjennomført både ein pilotstudie på tre ME-pasientar og deretter ein klinisk studie på ytterlegare 30 ME-pasientar.
Forskarane har gitt halvdelen av ME-pasientane to infusjonar av antistoffet Rituximab, medan andre halvdel fekk placebo (ikkje aktivt stoff). Denne immunregulerande medisinen reduserer talet på B-lymfocyttane (ein celletype i immunapparatet). Pasientane vart observert i eitt år.
– Resultata viser at behandlinga med Rituximab har gitt klar forbetring hos om lag 2/3 av pasientane, fortel Mella.
Responsen på behandlinga har hatt ulik varigheit frå minimum 2-3 månader og opptil meir enn 12 månader, og to pasientar har ikkje fått tilbakefall etter meir enn to års observasjon.
Autoimmun sjukdom
Ifølgje Fluge gir desse resultata ein sterk indikasjon på at B-lymfocyttane spelar ein viktig rolle i ME sitt sjukdomsbilete. At dei ser respons på denne typen behandling kan også seie noko om den hittil ukjende årsaka til sjukdommen. Dette er svært viktig for denne pasientgruppa.
– På bakgrunn av pasientobservasjonar og gjennomgang av litteratur er hypotesen vår at ME i utgangspunktet er ein immunologisk, sannsynlegvis autoimmun sjukdom hos mange pasientar, seier Mella.
Publisert
19.10.2011 19:30 |
Endret
27.10.2011 13:39