Helse Bergen får 1,6 millionar kroner for å redusere ufrivillig deltid 

Personal- og organisasjonsdirektør Trond Søreide ved Haukeland universitetssjukehus

Helse Bergen har lukkast med å få 1,6 millionar til eit nytt prosjekt, kor nyutdanna sjukepleiarar blir tilsett i fast full stilling ved Haukeland universitetssjukehus sitt interne Bemanningssenter.

Trainee-ordning
Ved tiltreding går den einskilde gjennom eit introduksjonsprogram og får systematisk kompetanseoppfølging og variert praksis i to år. Som del av denne praksisen vil dei nytilsette sjukepleiarane arbeide i vikariat i sjukehusets ulike avdelingar.

Reduserer deltid
- På Haukeland universitetssjukehus har vi gjennom ulike tiltak jobba for å redusere uønska deltid. Gjennom denne trainee-ordninga ønsker vi å tilby nyutdanna sjukepleiarar fast full stilling frå første dag, og på den måten forene både sjukehuset og dei tilsette sine behov for tryggleik, jobbengasjement og kompetanse.

- Godt prosjekt
- Vi har stor tro på at erfaringane frå dette prosjektet kan nyttast i framtida – både i høve til sjukepleiarar og andre yrkesgrupper, seier Personal- og organisasjonsdirektør Trond Søreide ved Haukeland universitetssjukehus.

Han ser frem til å starte det praktiske arbeidet med dette prosjektet, som vil krevje tett samarbeid med Sjukepleiarforbundet, føretakets leiarar og sjukepleiefagleg råd på sjukehuset.

Mange får støtte
Stortinget har løyva 75 millionar kroner fordelt på tre år til tiltak som kan redusere ufrivillig deltid. Arbeids- og velferdsdirektoratet og VOX, nasjonalt fagorgan for kompetansepolitikk, forvaltar prosjektmidla knytt til satsinga for å redusere ufrivillig deltid.

Helse Vest er tildelt 5 865 000 kroner av desse millionane, medan 1,6 millionar skal nyttast til tiltak i Helse Bergen. Helse Vest ønskjer at prosjektet i Helse Bergen blir eit pilotprosjekt som kan danna erfaringar for heile føretaksgruppa.

Les også saken som ligg på Helse Vest sine nettsider om dette.