Haukeland får tre nye nasjonale behandlingstenester 

– Ei fjør i hatten for våre gode fagmiljø, sa administrerande direktør Stener Kvinnsland under markeringa på Kvinneklinikken i dag.

Alle kvinner i Noreg med gynekologiske fistlar kan no bli tilvist til Haukeland. Fistlar er ein spesiell skade som ofte oppstår ved fødslar, operasjonsskadar eller tarmsjukdom, og som heldigvis er sjeldan her i landet

– Vi får landsfunksjon på bakgrunn av at vi har dyktige folk som har mye erfaring i å behandle gynekologiske fistlar i land som har høgare førekomst av slike skadar enn det vi har her i Noreg, sa Kvinnsland.

Internasjonalt samarbeid
Han understrekte samstundes tyngda av Haukeland sitt globale samarbeid med fleire internasjonale sjukehus.

– Dette samarbeidet har gitt oss kompetanse som vi har eit ansvar for å gi til alle dei som treng det også her i Noreg. Heile grunnlaget for det arbeidet vi gjer internasjonalt, kviler på at vi skal ha kompetanseoverføring begge veier, det er ein vinn-vinn-situasjon.  Ansvarstildelinga frå regjeringa er eit godt døme på at det nyttar å arbeide på denne måten, sa Kvinnsland.

Torvid Kiserud og overlege Jone Trovik skal behandle pasientar med gynekologiske fistlar.

– Mitt møte med desse kvinnene er årsaka til at vi er samla her i dag, sa han.

– Kvinner med fistlar i underlivet er ein sårbar pasientgruppe med sjenerande plagar som ofte reduserer livskvaliteten betraktelig, også i Noreg. I mange tilfelle fører det til isolasjon. Det gjeld kvinner i heile verda, ikkje berre i u-land som Etiopia, fortel Kiserud.

Kiserud er ansvarleg for behandlingstenesta på Kvinneklinikken, som forventar å ta i mot 25-30 kvinner kvart år framover.