Dobbel opningsseremoni 

Samarbeid
- Dette er samhandling i praksis, sa ein nøgd ordførar i Austevoll, Helge André Njåstad ved markeringa like utanfor Storebø.

Ambulansebåten er utstyrt for å brukast i brann- og redningstenesta og ved transport av helsepersonell på heimebesøk i kommunen med 667 øyar.

I tillegg kjem bil- og båtambulanseverksemda som er sjukehuset sine oppgåver. Nybygget inneheld treningsrom, leiligheit, ambulansegarasje og to bustadar for turnuskandidatar som jobbar i kommunen.

Fartøy alltid klart
– Denne nye basen er eit synleg og handfast bevis på at vi ønskjer å auke kvaliteten på dei prehospitale tenestene, seier seksjonsoverlege Guttorm Brattebø i Akuttmedisinsk seksjon på Haukeland. Brattebø samanliknar den nye ambulansestasjonen med ein luftambulansebase, der eit stort fartøy alltid ligg klart til å rykkje ut.


I pasientrommet på båtambulansen: Jostein Hovland er både matros og ambulansearbeidar på Rygervakt.

Jobbe sjølvstendig
- I byen kan mange andre bilar kallast ut på kort varsel dersom det er behov for det. Her er vi heilt åleine når vi rykkjer ut på oppdrag, fortel Jostein Hovland (bildet) om den største skilnaden ved å jobbe her og i byen. Hovland rullerer mellom Bergen sentrum og ambulansestasjonen i Austevoll.



Med ønskje om hell og lukke på havet: Gudmor for ambulansebåten "Rygervakt" er Ranveig Frøiland, styreleiar i Helse Bergen.




Administrerande direktør Stener Kvinnsland ved Haukeland universitetssjukehus klipper over oksygenslangen som markerer at ambulansestasjonen er opna.

1000 oppdrag i året
Oppdragsmengden ved Austevoll ambulansestasjon har meir enn dobla seg sidan 2003 til nesten 1000 oppdrag i 2010. Omlag fem hundre bil- og fem hundre båtoppdrag var det i fjor.



Austevoll ambulansestasjon er ein av 14 ambulansestasjonar som tilhøyrer Haukeland universitetssjukehus.

Norskprodusert båt
Ambulanse-katamaranen er bygd i karbonfiber som reduserer vekt og CO2-utslepp. Prislappen er 20 millioner kroner og den har ein toppfart på 35 knop. Katamaranen er den einaste av sitt slag i verda og er produsert hos Brødrene Aa i Hyen.

Innvending er det eit stort pasientrom som er utstyrt som ein vanleg bilambulanse, slik at det er enkelt å flytte pasient frå båt til bil. Landingsplass på fastlandet er Hjellestad kai i Bergen kommune.

Reiarlaget Rødne driv ambulansetrafikk på oppdrag av Haukeland universitetssjukehus mellom Austevoll og Bergen. Reiarlaget som held til på Finnøy i Rogaland driv også ein ambulansebåt for Helse Fonna og ein for Helse Stavanger.